唔知有冇人同少女一样一个人旅行会坚持要揾单人房住？我唔介意住hostel，共用浴室系可以的，但房呢，我唔系太钟意同陌生人share，因为训觉对我黎讲太重要啦，所以好惊人阻住我训觉......揾又平又高质既单人房住宿就成为我每次一个人出游最重要的小事。今次系台北揾到间好野，好适合喜欢住单人房的旅人啊！（当然多过一个人都可以住......）
卡乐町旅店（ColorMix Hotel & Hostel）位于超热闹又有MK情怀的西门町，捷运西门站1号出口直行大约行5分钟转右就到，好方便。楼高4层，设计走简约路线，又有少少型格。地下系reception，有电脑可以用。
1楼同2楼系房间，每层有10几间房，主要分单人房同双人房，而单人房系有好多种的。先讲我自己住的，就系最普通的单人房，基本上打开房门已经一眼睇晒间房有咩。有床、有枱、有电视、有冷气、有衣架、有毛巾。我好钟意佢既简单，因为我需要既都真系得甘多，间房干净舒适，一关埋门就好似拥有自己既小天地，不受骚扰，最适合想要私人空间的旅人。而平日一晚只需台币$1050，即港币$262咋！！！假日台币$1250，即港币$312，都系好抵！
不过我发现其实我间房争左一样野，就系个窗！所以间房会有少少焗，而其实hostel系有有窗既房拣，仲一样价钱！！！不过我订个时已经full左啦，下次我一定拣返有窗既房。第二日出门个时见到其他房执紧，有窗既房感觉真系好好多呀。
除左有窗单人房，仲有种单人房系训上格床，又有分有窗同冇窗，我自己就唔太钟意呢种房，要上楼梯，张床同天花板又好近，我会觉得有压迫感。呢种房平日比一般单人房平$100台币，只需台币$950，即港币$237，如果想悭到尽都不失为一个好选择。
其中一种双人房就是这样，同单人房差不多不过床变左双人床。网站有其他房型的相片，有更大空间的选择。而独立浴室好像有点太细。
所有单人房都冇独立浴室同厕所，要用共用的。而双人房就会有独立浴室。共用浴室有分男女，女在1楼，男在2楼。个共用浴室好大，有4格冲凉的，每格空间都几大。洗面、吹头既位都多，而且唔知点解我用个时都冇其他人用......正，所以呢部份我都觉得唔错。
顶层系天台，有洗衣房，亦提供左一个俾住客倾下偈同识朋友的空间，仲有好靓既涂鸦。Hostel每层都有水机，又有收得几好的wifi，员工都nice，唯一唔好系房既隔音有少少差，但整体黎讲都系物超所值，推介。
卡乐町旅店（ColorMix Hotel & Hostel）
地址：台北市万华区内江街55巷22号
交通：捷运西门站1号出口行大约行5分钟
房价：单人房平日每晚台币$950起
网址：http://www.colormixhotel.com/