距离慕尼黑大约3个钟车程的国王湖是德国一个好著名的湖泊，因为湖水呈现翡翠绿色，清澈见底，而且被群山包围，景色非常靓。德国政府为左维持国王湖的水质，规定只有手划船或电动动力船先可以在国王湖上行驶，据说国王湖的水质已达饮用水的标准，不过我当然唔会试，但就山长水远黎到呢个湖欣赏一下。
游湖方法当然就系坐船啦，讲德文的导游叔叔会一路介绍周围的景色，但当然我系听唔明。叔叔似乎成日讲笑话，见到同船的人都笑得好开心，呜呜，我都想听得明德文......好啦我唯有自己睇风景。睇下水又睇下山。个湖真系好大好大，风景非常壮观。而导游叔叔会在航程中途拎个类似喇叭的乐器出黎对住群山吹奏，大家就可以听到来自山谷的回音，好正！
船程中间有2个上落站，第一个站就系St. Bartholoma，大家会见到湖边有一座好可爱的红色圆顶教堂，中文系圣巴多罗买教堂，外形关系又称为洋葱教堂。教堂个名取自耶稣十二门徒之一的圣巴多罗买，里面开放参观，不过好细，好快睇完。
从教堂旁欣赏国王湖又是另一种风景，水真的好好好绿，好清，仲有好多可爱鸭仔游水添！
教堂附近有几间餐厅，有一间专卖鱼，我就试左啦。佢卖几种唔同的鱼，我都唔识分，就随意拣左一种，原条上好搞笑，味道也不错，可以一试。
食完之后再搭船去到第3站Salet，呢度最著名系一个叫Obersee（上湖）的湖，我最初都系因为见到呢个湖的相觉得太靓啦，所以好想黎。呢度真系一个世外桃源，风景非常非常优美，感觉好恬静好忘忧，完全是那种有洗涤心灵作用的地方。（但游人有点多，就破坏了宁静......）
然后又坐船回去啦。其实国王湖除左欣赏湖景，呢度仲有好多行山路线，适合喜欢行山的人。我黎个时就遇到一个德国人，佢黎国王湖就系准备行3个星期山......但因为由慕尼黑出发黎国王湖需时太耐，如果想行山可能要考虑住附近先够时间。在网上看到国王湖冬天落雪时的相觉得好靓，大家都可以考虑冬天黎呀。
国王湖 Konigssee
交通：由Munchen Hbf出发，搭火车到Berchtesgaden再转839/841/843巴士到国王湖（火车要转车）