去台湾太多次之后，开始要寻找鲜为人知的秘密景点，其实台中唔单止得清境同日月潭，仲有溪头！由台中火车站搭公车出发，大约个半钟就会去到溪头，呢度有2个唔多游客，但景色好好好美的景点，非常推介大家黎一日游！
去到溪头第一站首先要推介系忘忧森林。我黎溪头其实最主要都系因为呢个地方。呢度系台湾921地震后形成的一个枯木地带，原本正常生长的杉木林因为地震后河道阻塞形成淤积沼泽，杉木长期浸水而枯死，所以一个美丽地方背后的故事其实也是悲剧。预计几年后呢个景色会逐渐消失，因为唔少枯木已经开始倒塌，所以要睇就要快！
忘忧森林景色好迷幻，几百棵高耸入云的枯木好震撼。天气好而地下又有水的话会更靓，有枯木同天空的倒影，令人好难忘的景色！！如果天气唔好的时间来，画面应该会阴森同凄冷好多。
我去的时间游客唔多，环境份外宁静，又真系几忘忧。提提大家，呢度地面好湿滑又多泥泞，一定要着波鞋同埋小心行走，而且气温低，着多件衫。
忘忧森林位于高山地区，海拔2000米，上山只有一条路，一条好斜好多弯的路。上山有两个方法，台中架公车去到溪头总站落，之后转一架去杉林溪森林生态渡假园区的公车中途落车（上车同司机讲去忘忧森林），落车会见到好多茶叶店，可以选择行上山或者坐接驳车上去。如果行就40分钟，但条路真系好斜，会几辛苦。搭接驳车就10分钟，每人来回台币$200，即港币$50。又要强调条山路真的好斜，一般的士同私家车都唔会上到去，接驳车系四驹车，上山过程仲会好刺激，所以唔好妄想可以自己开车冲上去，的士包车都唔会肯载你上去。虽然路途遥远，交通又麻烦，但都觉得好值得去。
去完忘忧森林，推介另一个景点，就系杉林溪森林生态渡假园区。头先讲去忘忧森林个架车总站就系杉林溪。由溪头上去车程约半个钟，入场费台币$250，港币$62。呢个系一个亲亲大自然的好地方，海拔1600米，空气清新，成个园区有多条步道，沿路都系花草、森林、石洞、小河之类。有时间可以当行山慢慢行，或者搭园区的收费接驳车。
其中最值得去就系松泷岩瀑布。瀑布旁的岩洞有30米高，68米阔，企系岩洞仰望瀑布好震撼，水好澎湃好有气势！附近溪流的水好清澈，加上四周成个环境都系青山绿水，好似仙境一样！简直身心舒畅呀！
园区仲有另一个比松泷岩瀑布细小一点的青龙瀑布，可惜时间不够冇去到。杉林溪唔同季节都会有唔同景色，大家可以拣花季去。我去的时候是初秋，有少少红叶。在杉林溪随便散散步都觉得好舒畅，优美景色随时都会出现，建议可能预留一个下午系度。
最后介绍一个已经好多人认识，但我个人觉得好无聊的景点－妖怪村。溪头公车总站就系妖怪村，系一个以妖怪做主题的日式风格商圈。装饰其实都几靓既，有鸟居、日式灯笼同埋好多可爱妖怪造型的摆设，影下相都OK。但呢个商圈好细，主要只系卖食物同手信的店，可能都有人会觉得d妖怪造型手信好得意，但我个人完全没兴趣买，也不觉得我朋友会喜欢......半个钟不够就逛完了。虽然话就话开到夜晚8点，但食的小摊档好多5点几已经准备关门话冇野卖。反正顺路大家可以去逛逛，但绝对不用特登去，你会后悔的。
温馨提示：溪头系一个适合一日游的地方，因为夜晚完全没地方可以去，始终系山区，黄昏前就应该要走。由台中出发强烈建议包车，因为路途遥远，去忘忧森林同杉林溪都要转车，重点系公车班次唔多，一日得几班，时间好难夹。特别系由溪头返台中的公车最后一班系5点几，仲可能full左上唔到，就有机会要在溪头过夜。如果唔想包车，就预早出发，睇好晒公车时间表，买定回程车票啦。