泰国华欣系一个海岸城市，在泰国西南部，距离曼谷约3个钟车程，系泰国皇室好喜爱的避暑度假地。去华欣要先去曼谷再搭车，唔太方便，但亦因为甘华欣都唔算多游客，系一个比较宁静的度假地，岩晒想远离烦嚣，轻松放假的游人。华欣有唔少景点，但时间有限，所以就精选左3个景点去，介绍俾大家！
Santorini Park
希腊圣托里尼一直系少女其中一个旅游梦，实现之前先去华欣个圣托里尼主题乐园Santorini Park感受下假希腊气氛先。呢个主题乐园完全参照左希腊圣托里尼黎设计，周围都系蓝白色小屋，好有地中海风情！蓝白小屋系商店同餐厅，比较熟悉既品牌有Adidas、Converse、Nike、Timberland等等，有d仲系outlet黎架。
呢度仲有好多好少女的装饰，每个角落都好岩影相，少女们一定会好钟意。
乐园有几样游乐设施，每样都要额外收费，不过好多都系岩小朋友玩多d。我就玩左40米高的幸福摩天轮，$120泰铢一位，大约玩10分钟，转左3个圈。从高空上可以睇到成个圣托里尼主题乐园，仲见到隔条马路对面的骆驼公园，真系有骆驼架！哈哈。另外仲有双层旋转木马，都几浪漫架。
主题乐园星期1至5都系免费入场，周末就要收150泰铢。游乐设施另外收钱，而隔离仲有个水上乐园都要收入场费。去完呢个Santorini Park之后好想好想好想去真。希腊啊！！！
地址：Petchakasem Road, Amphoe Cha-Am, Phetchaburi, Thailand 76120
开放时间：星期1至5 10:00-20:00；星期6及日 10:00-22:00
入场费：星期1至5免费；星期6及日150泰铢
Swiss Sheep Farm
去完希腊，过一过对面再前少少就黎左瑞士喇！呢个Swiss Sheep Farm系一个好岩一家大细去的牧场，里面有羊、驴仔、草泥马、马、兔仔。入场费120泰铢，包左一堆草俾你喂羊。
好多等食的羊呀！！仲有羊仔，好得意啊！！你一拎堆草埋去佢地会超雀跃，冲晒过黎。仲可以买牛奶喂佢地。不过俾心理准备大家，都几大阵味架......
牧场另一受欢迎的动物一定系个样超萌的草泥马啦！有白色同啡色，总共大约10只。想喂佢地就用泰铢买包红萝卜条啦，佢地就会乖乖行埋黎等你喂架啦。佢地个样真系好傻猪呀！！
行行下发现有个兔仔地带，超多只活跃兔仔跑黎跑去，好可爱啊！！！但佢地系冇得喂既。另外仲有想人喂不过冇乜人理的驴仔......可怜。
Swiss Sheep Farm 仲有唔少好岩影靓相的装饰，又可以骑马同射箭，黎影下相同d小动物亘动下都几治愈。
地址：Petchkasem Road, Cha-am 76120, Thailand
开放时间：星期1至5 10:00-19:00；星期6及日 09:00-19:00
入场费：120泰铢
Plearn Wan
怀旧小镇Plearn Wan呢个名系「play」同「learn」的结合，而Wan在泰文有「昨日」的意思，即系一个集怀旧、玩乐同学习于一身的地方。Plearn Wan系一个充满怀旧布置的小市集，一入去好似即刻穿越左去5、60年代，原来入面系采用学校旧木头回收建造而成，成个气氛劲古典，免费入场。
呢度有好多店舖同车仔档，卖旧式玩具、手信、零食，其实卖既野唔算太吸引，不过就好符合呢度既气氛，都系好怀旧feel，有好多小时候见过的玩具呀！另外都有几档卖泰国特色小食，同埋有d摊位游戏。
入面个小摩天轮几靓，不过冇得玩架。虽然Plearn Wan都几特别，不过地方好细，影下相逛下都系一个钟左右就行完......
地址：Petchkasem Road, Soi Hua Hin 38-40, Hua Hin
开放时间：星期1至4 10:00-22:00；星期5 10:00-24:00；
星期6 09:00-24:00；星期日 09:00-22:00
去华欣之前做左数据搜集，除左上面3个主要景点，仲有d皇宫、怀旧火车站、水上乐园、沙滩同好多夜市可以去。但华欣交通唔方便，如果识揸车就自驾游啦，如果唔识就非常建议大家包车，先可以好方便兼用最少时间去最多地方！发现自己唔知几时开始钟意左包车旅行，好舒适，一玩完一个地方即刻跳上车，轻轻松松又去到第二个目的地，完全唔需要知道景点位置都冇问题，事前都可以节省好多计划时间！不过大家揾包车公司个时记住格下价，我揾左几间，同一个行程价钱每程相差几百蚊，小心选择呀。