贵为泰国皇室喜爱的度假胜地，以为去华欣度假会好贵？错啦，华欣其实系一个平价度假天堂，好多好靓的度假酒店，间间都有浓厚度假气氛，而价钱都好平民化，平均都系几百蚊至千零蚊一晚，已经有5星级享受啦！多番挣扎之下，终于拣左以下呢一间！
Evason Hua Hin Resort距离华欣市区约40分钟车程，唔近市区，但绝对系远离烦嚣之选。一踏入度假村已经觉得非常放松，周围都种左好多椰树同植物，一片翠绿，空气都特别清新。Reception系木建的，check in个时职员会邀请你坐梳化，再俾茶同毛巾你，服务态度非常亲切友善。
重点来了！Evason有几种房型，我住的系Villa，几种房型中最贵，大约港币$1300一晚，但无论房里面的设施定度假村的设施同整体质素都令我觉得呢个价钱超值！先介绍下间房啦，分室内同室外两部份，室外有私人泳池、方型浴缸、凉亭同两张沙滩椅。私人泳池系我今次旅程拣酒店指定一定要有既设施，泰国甘热如果可以无时无刻跳落水实在太正啦！而呢个私人泳池都算几大，水深大约1.2米，真系游到水，不过我都系用黎玩下水架咋。另外个方型浴缸都好正，夜晚可以睇住星星浸浴，真系超级放松写意的享受呀！
室内的部份都好唔错，空间大，床好大好舒服，有帐幕，佢咪系传说中的公主床？头先话室外有浴缸，房入面个浴室都有淋浴间，而且好大添。比较深刻系有咖啡机、好多茶包咖啡、免费生果同好多body cream。成间房的设计都散发一种大自然悠闲风，超舒适der～
我成日都觉得一间好的度假村必须要有一个好靓的公众泳池，Evason就有啦！泳池都几大，周围种左好高好高的椰树，而且隔条马路就系沙滩，望住个海游水好开心！
除左游水，度假村仲有好多活动俾住客参与，有d需要收费，有d免费，包括打网球、做SPA、租单车、学泰拳、瑜珈堂、学整泰菜、local tour等等。房间有活动时间表，每个月都会转，我今次住的时间唔够长，（主要是花太多时间玩水同午睡......）所以只做了spa。其实好多活动我都超有兴趣，下次有机会再黎我一定要住多几晚玩多d野。而呢度的spa据说系好受欢迎的，我都觉得选择好多而且好舒服，但价钱略贵，两个钟的磨砂加泰式按摩要港币$800多，虽然系5星级酒店的合理价钱，但因为总系觉得泰国spa应该系平，同埋度假村房价同其他服务都算平，就显得spa唔算太抵啦。
至于食呢，度假村有几间餐厅，各有特色。食自助早餐的The Restaurant，自助早餐选择都算多，西式泰式日式咩都有d，质素就正常啦，未至于想赞佢。哈哈。
The Restaurant隔离有间地中海餐厅Coast，朝早都会开放埋俾大家食自助早餐，但主要只系提供多点座位，食物都在The Restaurant。夜晚就有地中海菜食。好钟意Coast的环境，可以见到海滩，好有地中海度假feel。
仲有间食泰菜的叫Kieng Sah，我食过晚餐，二人套餐只需港币$500，有6道菜再加甜品，够晒丰富之余仲又平又好食。留在度假村食晚饭的客人唔多，职员们服务超好，推介。
泳池隔离有间The Bar，我食过下午茶，有西式亦有泰式野食，水准唔错。夜晚会有live band表演，听下歌饮返杯cocktail，气氛好唔错。
如果想住Evason但又唔特别想住villa，都可以拣Evason Room 或者Evason Studio ，冇私人泳池，最平港币$500几就可以住一晚啦，几抵架！
Evason Hua Hin Resort
地址：Pak Nam Pran Rd, Pak Nam Pran, Pran Buri District, Prachuap Khiri Khan 77220 Thailand
网址：http://www.sixsenses.com/evason-resorts/hua-hin/destination
房价：Evason Room 约港币$560/晚；Evason Villa 约港币$1300/晚