出黎啦酒鬼们！Gotcha！少女闲时都钟意揾间有style的酒吧饮饮cocktail同frd子风花雪月，今次就有间由获奖无数的cocktail大师主理的酒吧想推介俾大家啦。位于佐敦伟晴街的Funky Monkey，店如其名，装潢好funky好有style，劲有异国情调。
老板系来自尼泊尔的Dipen，佢来头非常强劲，曾经赢过多个cocktail比赛，其中一个就系好出名的「42Below Cocktail Competition」，仲曾经代表香港去新西兰参加世界赛，仲入埋决赛添，可以话系一个cocktail master！所以今次黎到Funky Monkey最重要就系试佢亲自调的特制cocktails！
Cocktail分左3类，第一类系Tiki Cocktails；第二类系Berries & Fruits；第三类系Flowers Spiced。第一类的Cocktail系青柠系列，其中一杯叫Flaming Monkey，个杯好得意，上个时仲会点火，好有型！第一下会烧到好劲，之后冷静左张相都仲见到个火。第二杯系Tiki Monkey，同第一杯一样都有青柠在面。Tiki Cocktails酒味会比较重，又会带点青柠酸味，适合少男们。
而少女口味都好少女架麻，所以就偏好第二同第三类，果味同花味重的Cocktails。我就试左第二类的Soultini，粉红色好得我欢心，混合士多啤梨、热情果、菠萝、柠檬味，甜甜地又有生果的清新，好饮。不过我最钟意系属于第三类的Blackberries & Lavender，杯酒好靓，有真花做装饰，少女味出晒黎！Cocktail有淡淡薰衣草香，酒味唔浓，饮完一杯劲想encore！
Funky Monkey既cocktail就够晒有特色，但老板唔单止注重酒的质素，连食物都有惊喜！酒吧以西餐为主，亦有来自老板家乡的尼泊尔菜。我就试左一份炸鸡翼，炸得好香脆，最特别系个酱，蕃茄味加少少辣，好开胃。另外叫左一个Lousiana Pizza，材料有鸡胸肉、杂菌同mozzarella cheese，重点都系个酱呀，竟然系酸忌廉加泰式辣酱！呢个配搭系咪好新颖？个味原来好夹架，感觉好fresh，加埋pizza本身都好好味，推介！
对于仲未有机会踏足尼泊尔的少女黎讲，尼泊尔菜系好新奇的，今次都系第一次食尼泊尔菜。呢个名为MOMO的尼泊尔招牌菜，外型似足小笼包，食落味道都似，但皮会厚身少少，里面系菜同鸡肉，肉汁多。Again，又系个酱汁系亮点呀，由几种香料混合而成，一上枱已经闻到好好香，食落少少辣又有少少酸，味道有点复杂，但好好食呀，呢个系我既必食之选！所以我结论系Funky Monkey除左卖cocktail，仲卖酱......哈哈。
最重要系Funky Monkey既价格好抵，食物大多系$50-100，份量适中，Cocktail平均$100杯。想感受一下尼泊尔风情，饮杯特色cocktail，就要黎Funky Monkey啦！顺带一提，老板有另一间分店在中环Soho，叫Hidden Garden，走高档少少的路线，大家都可以去试下呀。
Funky Monkey
地址：佐敦伟晴街17号地下（地铁柯士甸站A出口行约3分钟）
营业时间：星期一至日 11:00-01:00