好多人都觉得首尔净系行街买野，其实唔系架！离开首尔市中心的近郊地区有好多有特色的景点，当中唔少都系著名韩剧同综艺节目的拍摄地，韩迷一定会好有亲切感！今次就参加左由KLOOK赞助的首尔近郊一日游，一日去左两个位于京畿道的景点，包括小瑞士村同香草岛乐园，等我介绍下啦！
大约中午时份司机就系东大门接我地，先车我地去食左个好地道的韩式午餐，个好好味！之就出发去小瑞士村。位于京畿道的小瑞士村，系综艺节目「我们结婚了－世界版」的主要拍摄场地，仲有「Running Man」同金秀贤X孔孝真个套「制作人」都曾经系度取景。我去个日都见到有摄制队唔知拍紧广告定韩剧。
小瑞士村系个好童话的地方，聚集左好多七彩缤纷欧洲风格的小屋，其中有几间系唔同主题的博物馆，有圣诞、酒、熊等等做主题，可以入去参观，不过就唔好太大期望喇，都系屋外面比较靓。而有几间屋真系有人住紧架，唔开放参观，大家都要安静一点点，如果你有钱都可以系度买一间童话屋！！
呢度周围个风景系几似瑞士，因为俾群山包围，个核心外围环境超舒适，黎散散步心情舒畅。而个核心内围，即系屋仔个部份更似德国的罗腾堡，系个梦幻童话小镇，好岩少女们黎影相！可惜我去个日落雨，如果天气好浪漫程度会大增呀。
下一站系香草岛乐园，一个以香草做主题的地方。佢有全韩国最大的室内植物园，拥有180多种香草植物，钟意花花草草绿色世界的会好开心。其实香草岛乐园最大卖点系夜晚的灯饰！乐园设计走欧陆小镇风，加埋遍布四周的闪亮灯饰都几梦幻几浪漫几sweet架！你地最钟意的「Running Man」都黎过取景，仲有好多韩剧都系度拍，其中一套系由苏志燮同申敏儿主演的「Oh My Venus」。谂谂下呢个行程都几岩情侣，两个景点都系浪漫风，系咪好想同你既oppa黎呢？
小瑞士村同香草岛乐园都离首尔市中心几远，要两个几钟车程，如果自己搭车都几麻烦，所以参加一日团系好好既选择，全日有司机接送又包晒景点入场门券，完全唔驶自己plan，又唔驶揾点搭车，好方便。今次参加KLOOK一日团好开心，遇上好nice的司机兼导游oppa，佢系韩国华侨，识讲普通话同韩文。于是我叫佢教我讲傻仔既韩文，学识之后我讲左成程车，不停自己加oppa、onni、阿猪妈、阿渣si系傻仔后面，佢笑到癫左......
KLOOK有亚洲地区多国的一日团、景点门券、包车服务同有趣体验，plan行程个时可以去睇下有咩特别地方玩拎下灵感。有时唔想自己花时间计划太多，参加一日团就岩晒，大家可以根据想去的地方或者主题寻找合适的一日团，轻轻松松一次过玩晒想去的地方！
小瑞士村
地址：京畿道加平郡雪岳面多乐斋路226-57
开放时间：星期一至日 11:00-18:00
入场费：成人10000 won （约港币$70）
香草岛乐园
地址：京畿道抱川市新北面三政里517-2
开放时间：平日10:00-21:00；星期六及国定假日10:00-23:00
入场费：成人6000 won （约港币$42）