东京近郊有好多值得去的地方，其中少女最钟意就系位于长野县的轻井泽。由东京市区出发，搭一个钟左右新干线就到啦！去轻井泽最抵的交通方式系买一张叫JR东京广域周游卷的3天pass，呢张pass要10000 yen，可以连续用3日，指定地区任搭，包含路线好广泛，机场都包。本身由东京上野站去轻井泽来回车钱已经超过10000yen，所以净系去轻井泽都已经抵。如果再用呢张pass去埋其他包含的地方，可以话等于其他车程免费，所以张pass系必买。温馨提示：买左呢张pass之后都要另外在车站揾职员出车票划位，唔系买左pass就可以乱入闸上车架。而去轻井泽仲可以拣巴士，会平好多，但时间耐好多，一程要3个钟，所以我都冇考虑。（JR东京广域周游卷：详情）
游轻井泽可以选择超chur一日游，但我觉得两日一夜会比较好，想relax一点去3日都唔会觉得闷。今次我去左两日一夜，虽然都算去晒我想去的地方，但仍然好想重游，因为呢度真系一个好舒服好靓！
轻井泽站分南北出口，简单将轻井泽划分左两部分。景点集中在北出口，但南出口都唔可以忽略，因为个边有一个超重要的景点，就系全日本最大的outlet！！！呢个叫王子购物中心Prince shopping plaza outlet，系一个超超超大的outlet，有超过230间店，一出车站就见到。
要好好行Prince outlet首先一定要拎张地图，拣好自己想行的品牌，重点出撃。Outlet有好多国际名牌、日本品牌服饰、家居用品、连动品牌、玩具同宠物用品等类别，仲有30几间餐厅，总之任何人都一定揾到自己想睇的店舖。少女心水推介系日本的Earth & Music Ecology 同 Lowrys Farm，相信好多香港少女都好熟悉呢两个品牌，而outlet呢度系卖紧最低2折！！！好多衫都系港币$100以下，所以最后我买左好多好多野！！！满载而归呀～除左减价货品都会有转季新衫，一般都有8-9折。大家可以留意各间店的退税政策，多数都系买满5000 yen就可以即时减免税项，抵上加抵！
Prince outlet除左系一个俾大家疯狂购物的地方之外，仲系一个同一般公园无异的relax地。呢度有好大片草地、俾小朋友玩的小型游乐设施、水池，环境好优美，间中仲会有表演活动。所以除左天生购物狂，仲发现呢度有好多一家大细、放狗的老人、闲聊的大伙儿......整个感觉都好合家欢。完全就系唔买野都黎坐下啦hea下啦的好地方。
至于北出口，都可以再分两部份，一部份系星野度假村地区，属于中轻井泽；另一部份系旧轻井泽区。先讲星野度假村地区，车站南出口有免费接驳巴士去，大约20分钟车程。之前去北海道曾经入住同一品牌的度假村，感觉非常好，就系好豪华的度假村。轻井泽呢间星野度假村都系走尊贵奢华路线，但即使唔入住酒店都仲有好多野可以睇，或者净系黎浸温泉都得。整个星野区都系一个森林的环境，好多好多树同溪流，融入大自然的感觉好放松写意。
今次我就主要黎参观两个教堂。第一个系高原教会，呢间系日本第一间可以俾新娘着西式婚纱举行婚礼仪式的教堂，小木屋型的教堂细细间，好精致。参观的时候有人正举行婚礼，有工作人员清场，连接近教堂都唔可以，等到行完礼，教堂就会开放俾公众参观，不过都只系开左度门俾大家从门口望一望入面，唔准影相。而且呢间系超受欢迎的教堂，婚礼一场接一场，上一场完左大约开放左10分钟就又再清场准备下一场婚礼，所以有点运气先睇到入面。我觉得呢间教堂最大卖点系被森林包围，当然里面都好靓。工作人员会简单布置教堂外的森林区，行完礼新人会同宾客一齐在森林区影相，浪漫啊！
另一个出名的教堂系离高原教会大约5分钟路程的石之教会。呢间教堂外型好特别，完全唔似一般的教堂，佢系一座融合石、光、水、树木、绿色的教堂，由美国的建筑家内村鉴三兴建。大家睇下个门口系咪好有型？石，全部都系石！沿路入去都系石！同高原教会一样，有人举行紧婚礼就唔可以入去，正常情况应该都系婚礼与婚礼之间有少少空档都会开放，但我今次冇等啦，唔知等几耐先完。想拥有一个与别不同的婚礼，石之教会系好选择，不过呢，我个人就喜欢高原教会多一点啦，少女d丫麻......
参观完教堂，可以逛逛榆树街小镇，有商店同餐厅，环境都几靓。
星野度假村有一间好出名的餐厅叫村民食堂，采用来自信州的新鲜食材，味道质素的确唔错，但系等位等好耐。如果佢地好full我可以理解，但重点系佢地人手唔够，即使店内有好多好多空位，出面又有好多好多人等紧，佢地都系要隔左好耐好耐先得闲执枱再俾人入座。我望住餐厅里有超过10张空枱足足半个钟，佢地都冇安排等紧的人入座，好无奈。如果唔需要等，我觉得可以一食，要等就唔太值得。下次黎轻井泽希望可以住到星野度假村啦！！！
离开星野区，可以去旧轻井泽。其中一个景点系云场池，池水超清，倒影好靓，可惜去的时候天阴阴，景色争左少少，如果系蓝天白云，或者红叶期黎一定好好好靓。
从云场池可以行去银座通，行街的地方，好逛系因为有好多特色小店，而且间间小屋建筑同布置都好靓，有点欧陆风情。特别推介系轻井泽的手工果酱，有好多特别味道，布丁味超正呀！！！
银座通附近又有另一个教堂，圣保罗教会，由美国建筑家安东尼雷门以欧洲的乡间教堂风格所建造，主要材料系木同水泥石板，但来的时候没有开放参观。轻井泽真系一个教堂之地呀。
最后介绍一下今次入住的酒店，叫Chisun Inn，距离轻井泽站大约35分钟路程，搭的士就5分钟左右。但记住日本的士好贵，短短5分钟已经要港币$150！！！我试过行，都试过搭的士，如果唔系带住行李，出入踩单车应该系最好。后尾问职员有巴士可以搭，但我去个时系日本假期所以冇......地点黎讲的确唔多值得推介，但轻井泽住宿偏贵，呢间港币$1000/晚，我觉得算合理，而且间房都好干净、舒服，出入的路都好易行，所以都可以考虑。
我真系好钟意轻井泽，因为周围被森林包围，成个感觉都好放松，而且沿路有好多欧陆式小屋，好童话！！轻井泽系一个好适合踩单车的地方，强烈大家要租单车！今次有点赶急，天气亦不算好，所以希望出年红叶期可以再黎一次，要去埋白丝瀑布同住星野！
