两年前第一次踏足关岛，已经觉得「哗，呢度真系好靓」，我去过唔少以阳光与海滩作卖点的地方，关岛暂时系我去过最靓的。两年后有机会重游，特别鸣谢关岛观光局的邀请，将我带返黎呢个天堂，再一次感受关岛的美好。知道好多人对关岛都唔多认识，所以重游关岛的第一篇游记，就由Q&A开始，简单介绍一下呢个太平洋岛国。
Q1 关岛属于咩国家？香港人去要唔要签证？
关岛位于太平洋上，系美国的属地，曾经经历过西班牙同日本的统治，在第二次世界大战完结后正式成为美国属地。香港人持特区护照去美国要签证，而且都几贵下，但去关岛竟然系免签证的，所以好正架！！！不过入境个时要带定香港身份证。另外，持BNO去关岛都系免签证。
Q2 由香港飞关岛要几耐？有咩航空公司选择？
虽然关岛系美国属地，但离美国都几远，反而由香港直飞关岛只需大约4个半钟，都算好近。直航有两间航空公司可以选择，第一间系传统航空公司联合航空，每星期4班来往香港同关岛，凌晨机去黄昏时间返。第二间系廉航香港快运，2016年12月15日将会首航来往香港同关岛直航，每星期4班机，时间唔错，早机去黄昏时间返。价钱比较，一定系联合航空贵，正价3000几未连税，有时减价2000几。香港快运正价唔知道，反正成日减价，一减价可以减到只需几百蚊一程，抢到减价飞的话好抵，不过唔包行李同飞机餐，加加埋埋又可能同联合航空减价个时差唔多。
除左直航外，仲可以选择转机。可以搭长荣航空去台北转；日本航空去东京转；大韩航空去首尔转。
Q3 关岛住的多数系咩人？讲咩语言？用咩货币？
关岛一半系查莫洛人，即系关岛的原住民，有1/4系美国人。佢地主要都系讲英文。佢地仲会讲查莫洛语，不过唔会同你讲，讲黎讲去都系hafa adai，即系hello。美国地方用美金呀。
Q4 关岛有冇冬天？同香港有冇时差？
怕冻的孩子有福了，关岛全年夏天，气温维持在24-30度，香港冬天个阵黎避寒一流。不过关岛都有分两个季节，就系7-11月系雨季；12-6月系非雨季。雨季的关岛一日可以落几次雨，但好多时都系落一阵就停，出阳光一阵又落一阵雨。除非净系流连商场，如果唔系要注意关岛户外地区极多，雨季真系要带定遮出去。
关岛快香港两个钟。
Q5 关岛有咩交通工具？交通方唔方便？
关岛系一个好适合自驾游的地方......（系咪即系间接答左第二题？）先讲机场交通啦，大部份酒店都提供免费机场接送服务，所以呢部份唔驶担心。如果唔识?车，在关岛就只有巴士或者的士可以搭，巴士其实都几方便，好多主要景点都去到，而且唔少酒店都有免费接驳巴士去杜梦湾个商场区域架！当然都系租车自驾游最好啦。
Q6 关岛点玩法？
黎紧会写详细（少少）的游记，不过都可以先简单讲下等大家有个概念。关岛可以简单划分几个区域，我当然冇全部去晒，但都去过最主要的3个部份，包括杜梦湾区、亚加纳地区同南部。
杜梦湾区可以当系关岛市区，最热闹、最多商场、最多酒店、最多游客的地方。呢一区好有美国风情，但最吸引我系杜梦湾本身，系一个好好好好好靓的海湾。我觉得呢区可以留返每晚完成晒下画的行程同活动之后先黎食饭行街。呢度有个关岛最出名的景点－情人崖，黄昏睇日落海景好正。
亚加纳地区系一个比较多历史同文化景点的区域，大部份景点都同关岛以前的战争历史有关，或者系西班牙统治时期遗留落黎的建筑物。
南部地区以大自然景色为主，睇海睇山睇瀑布，钟意天然风景的一定要黎南部。
黎到关岛，绝对唔会只有静态观光，大部份时间应该都会去左玩好多唔同的刺激活动！一连串水上活动包括水上电单车、划独木舟、香蕉船、海上拖曳伞、浮潜、深潜、坐潜水艇、出海睇海豚......玩完水就上天空啦，高空跳伞、驾驶小型飞机或者玩滑翔伞都好正。其他好玩活动仲有高空滑索、实弹射击、美式赛车、四驱车......关岛真系好好好好多野玩架，想报名参加以上活动可以预先上网报定，或者去到当地经酒店或旅行社报都得。
假设你黎关岛一星期，用2日观光同购物，仲有3-4日可以玩尽唔同的活动，有时间净就享受下酒店设施（关岛酒店大多系resort，正架），再随便揾个沙滩晒下太阳，完美假期。
