澳洲游记由墨尔本市区开始！少女都几钟意墨尔本个市区环境，虽然话就话系市区，但都唔系好多人，气氛都系好澳洲，即系好悠闲。而且周围好多维多利亚式建筑物，有点古典味道，又系一个加分位。墨尔本市区都几多景点，今次精选左3个景点成为一条路线，可以一日去晒，中间仲有时间可以行下街，去下博物馆。
第一站系Queen Victoria Market，系墨尔本最出名的大型传统市集，更加系世界第三大的露天市集，由1857年开始营运至今，有相当的历史。市场划分左好多区域，好整齐，货品简单可以分食物类同非食物类。食物类有超多选择，海鲜、肉类、蔬果、零食、酒......咩都有，多到你会唔知点拣好。非食物类就有好多杂货啦，例如纪念品、工艺品、衫裤鞋袜、家居用品......黎买手信都唔错架！另外仲有个food court，有唔同国家的菜式，质素正常啦，又唔系话特别好食既。整体黎讲市集好干净，都几好逛，但我冇乜影相添。要留意Queen Victoria Market每日开放时间都唔一样！！！要睇得好清楚再安排行程呀。
朝早去完Queen Victoria Market，下昼就可以留在Central地区啦。由市集行去Central地区大约半个钟，见到一间超古典的H&M就到左啦。呢度系墨尔本最热闹的地区，有好多商店可以行，好多餐厅，我觉得条街好靓！要留意系澳洲商店都好早关门，大约5点就会火速收工，条街就会突然好静......第一日黎我系吓亲既，仲谂住食个下午茶再慢慢行街，但行左一阵已经发现大家执紧野准备收工......所以中午开始行就差唔多啦。
继续都系属于Central地区，有个好靓的火车站叫Flinders Street Station，呢个系墨尔本一个地标，都有过百年历史。
Flinders Street Station对面系我想介绍的第二个景点，就系一条画满涂鸦的巷仔，名为Hosier Lane。呢度系任意俾人画涂鸦，所以每隔一排就会有新的涂鸦，每次去都会睇到唔同的作品，好多涂鸦都画得好靓！话说我曾经睇过有朋友去呢度有大眼仔的涂鸦，所以我就好想黎啦，但我黎到揾极都揾唔到，我谂佢已经俾其他公仔覆盖左......鸣！其实墨尔本周围都有好多涂鸦，行行下就会见到，不过想好集中欣赏下墨尔本的街头艺术就一定要黎Hosier Lane。
行完之后去返Flinders Street Station，穿越个火车站另一边会见到有条河，过左桥再行多几分钟就会去到第三个景点，观光塔Eureka Skydeck 88。观光塔系好多城市都有的东西，墨尔本呢个有咩特别呢？佢系南半球最高的观光塔，高297米，可以360度睇到墨尔本的景色。最特别系上到88楼的观光楼层，个度有一个包厢会伸出半空中，包厢有个名叫The Edge，个底系透明玻璃，即系好似香港昂坪360缆车个水晶车厢呢，你就会觉得自己企在近300米的半空中，好刺激地睇风景。呢个系全球唯一的体验！上观光塔要澳币$20，约港币$120，如果想入个透明包厢就要加多澳币$12，约港币$72。
如果对个透明包厢冇特别兴趣，都仲有一个室外部份，可以唔驶隔住玻璃睇，但就隔住铁丝网睇，不过景色都好唔错架。高空睇墨尔本好靓！
而点解呢个景点放最后呢？因为想建议大家日落时份黎，而夏天的墨尔本系8点几先日落架......行完街睇埋涂鸦再食个quick dinner先黎都仲得。
Queen Victoria Market
地址：513 Elizabeth St, Melbourne
开放时间：周二及周四：06:00-14:00；周五：06:00-17:00；周六：09:00-15:00；周日：09:00-16:00（周一及周三休息）
网址：https://www.qvm.com.au/
Eureka Skydeck 88
地址： 7 Riverside Quay, Southbank, Melbourne
开放时间：每天10:00-22:00 （最后入场21:30）
票价：澳币$20，约港币$120;The Edge 澳币$12，约港币$72
网址：https://www.eurekaskydeck.com.au