心斋桥应该系个个去大阪都一定会行的购物街啦，每次去都多人过行年宵，不过又真系几多野行既，仲好多好野食添！今次要介绍来自美国的人气龙虾三文治Luke's Lobster，大阪分店就在心斋桥啦，位置大概在心斋桥后半段，GUCCI对面。
间店都几受欢迎，间中要排队，我去个时系朝早大约11点半，只系排左5分钟，但有次夜晚8点经过见到条队排到出门口，大约30人，大家有心理准备啦。间舖唔大，可以好清楚睇到职员整三文治的过程，都有少少位俾大家企系店内食，大约企到5个人啦。
呢个就系menu，主要就系得3种三文治，分别系龙虾、蟹同埋虾，可以拣双拼。加400yen变套餐有饮品同一包薯片。龙虾系主打，有两种size可以拣，US size比regular size大，价钱贵600yen。
呢个就系US size的龙虾三文治啦！所有龙虾肉都系由美国新鲜直送到日本，好鲜甜，啖啖肉好好食！！！个包加左牛油烘过，职员会先将龙虾肉放在包上，加酱汁，最后洒黑椒同盐。酱汁系由柠檬、牛油同糖混合而成，其实食落个酱汁唔系太浓，但加埋黑椒同盐就好香好惹味啦！
Regular size大约细1/3，影出黎好似差唔多，但其实龙虾肉细旧同少d。我个人推介食US size，因为龙虾肉真系太好味啦，大大旧食开心好多，regular size满足唔到我呀。提提大家，包系热，但龙虾肉系冻架。其实US size都几贵，1580yen，7算的话都要港币$110，但觉得都接受到，因为真系好好食麻。
见到其他人买双拼，应该系龙虾加虾。下次再试下蟹同虾先～东京表参道都有分店架，不过最正应该系飞去纽约食总店，哈哈。
Luke's Lobster
地址：大阪市中央区心斋桥筋1-3-21 1F
交通：地下铁心斋桥站4号出口行3分钟
营业时间：每日11:00-21:00