台湾有好多适合亲子游的农场，环境优美，又有得意动物，其中唔少都可以近距离接触，例如同佢地影相或者喂食，大人小朋友都会玩得开心！钟意睇动物的一定要去花莲的新光兆丰休闲农场，因为呢度有几种唔常见但劲趣致的小动物！
兆丰农场好大，占地726公顷，入口可以租单车、电动车或者行去搭小火车，我就拣左单车游园啦，农场d路好好踩，路线规划得不错，而且周围都系花花草草，成个气氛好悠闲写意。
小动物划分左唔同园区，我最钟意系浣熊区，有10几只超活泼浣熊排排企，等你喂食，你可以抛d粮俾佢地，佢地会抓黎食，超级超级得意呀！！其中一只叫拜托哥，因为你叫拜托，佢就会两只手合十上下郁动，好似做拜托的手势，非常有趣！最后个张相就系拜托哥啦！
另一种有趣动物系唔常见的树懒，我第一次见，仲可以超近距离接触！！！兆丰农场有3只树懒，佢地系一家人，爸妈来自南美，早年生左个仔，佢初三出世所以就改名为初三。坦白讲佢地个样非常古怪，唔系可爱个种动物，但个样都几好笑，对眼好大，仲大，同佢地好近地对望会不知所措，哈哈。佢地会倒吊在树上或铁栏训觉，食萝卜同菜，游客可以喂佢地。自从卡通片《优兽大都会》（Zootopia）播出之后，好多人都觉得电影里的树懒阿闪好好笑，所以多左好多人黎兆丰农场睇树懒。现实中的树懒动作都系好慢好慢，每一下只系移动好少，喂食者要俾耐性。
兆丰农场仲有几只超级大象龟，其中一只最大的已经40几岁，最多可以活到200几岁架。佢大概系一个呼拉圈的size，即系好大，重量接近100公斤，夸张！几只象龟在草地自由行走，游客都可以好近摸下佢地。
仲可以同两只鹦鹉影相，一只红色，一只黄色，佢地个爪劲硬！每日有两个影相时段，入场时拎个地图时间表先。
农场仲有其他动物架，例如雀乌、鹿、袋鼠、牛等等，大家自己发掘啦～另外仲有花园、湖泊、温泉、住宿等区域，玩足大半日都冇问题。
除左去农场，出海睇海豚都系花莲的亲亲动物好节目。今次参加鲸世界赏鲸公司的船队，在花莲港出发，驶出太平洋，据说见到海豚的机会率达95%。有时仲会见到巨型鲸鱼！花莲适合赏海豚及鲸鱼的月份是4-10月，但其他月份只要天气情况许可，都会有船出海。为安全着想，登船时要着救生衣。
航程中导游会讲解海洋知识和介绍海豚种类及习性，花莲外海可以见到的鲸鱼和海豚种类达27种，每次都有机会见到不同种类的。船驶到海豚经常出没的海域，船上会有专人搜索有海豚的位置，出现的时候就会开咪话俾大家知，大家都唔会错过见到海豚的机会。我都见到啦！！！每次都见到几条海豚一齐跳出海面，上黎一下又落返海，见到好多次！今次系第一次见到野生的海豚，平时都系水族馆同海洋公园见到，野生海豚当然系活泼好多啦。导游话有时海豚会跟住架船游水，可以近距离见到，但今次就冇啦，都系比较远距离。
除左睇海豚，出海仲可以见到花莲的著名山水景点，例如太鲁阁、清水断崖、七星潭等等，导游会一直介绍，景色非常唔错。
鲸世界每日有5班船出海赏海豚，每节大约两个钟，成人票价台币$1000，约港币$250，上网提早预约有优惠价。提供免费市区饭店、机场、火车站接送服务。另外推介去码头隔离的中日和海鲜餐厅，好多新鲜海鲜，好好味！落船之后食返餐好就最岩！
新光兆丰休闲农场
地址：台湾花莲县凤林镇永福街20号
开放时间：每日08:00-17:00
入场费：成人每位台币$350，约港币$88
网址：http://www.skcf.com.tw/
鲸世界赏鲸公司
地址：台湾花莲市中美路315之1号
船票：成人每位台币$1000，约港币$250（官网提早预订有折）
网址：http://www.huadong.com.tw/
香港快运开通来回香港至花莲直航航班，一个钟40分钟就去到花莲，系香港唯一直航，票价仲经常有优惠，非常推介！详情：http://www.hkexpress.com